ALLAHın ayı xoş gəlir!

ALLAHIN AYI GƏLİR – RAMAZAN AYI İLƏ BAĞLI ELAN

“İnsanlara doğru yolu göstərən, bu yolu açıq dəlilləri ilə aydınlaşdıran və (haqqı batildən) ayıran (Quran) ramazan ayında nazil edilmişdir. Aya (ramazan ayına) yetişən şəxslər (bu ayı) oruc tutmalıdırlar; xəstə və ya səfərdə olanlar isə tutmadığı günlərin sayı qədər başqa günlərdə tutsunlar. Allah sizin üçün ağırlıq deyil, yüngüllük istər ki, fövtə gedən günlərin orucunu tamamlayasınız və sizi düz yola yönəltməsinə görə Ona (“Allahu əkbər” deməklə) təzim və şükür edəsiniz.” (Bəqərə:185)

Ramazan ayı Allahın bəndələrinə böyük lütfüdür. Peyğəmbərimiz (s) buyuruduğu kimi, bu ay daxil olduqda göyün qapıları açılar və ay boyunca açıq qalar. Ramazan ayının gəlişi ilə  bəndələrin üzünə cənnət qapıları açılar, cəhənnəm qapıları bağlanar, şeytanlar zəncirlənər, günahlar isə yanar. İlahi ziyafətə hazırlaşan hər kəs bu mənəvi fəzaya xüsusi hazırlıqla daxil olar.

Bir çox hallarda Ramazan ayının ilk günü gec elan olunur. Məsələ orasındadır ki, ayın görsənməsindən asılı olaraq, eyni qəməri ay 29 və ya 30 gün ola bilər. Ona görə bir çox oruc tutan şaban ayının otuzuncu və Ramazan ayının birinci günü arasında şübhəyə düşürlər. Bu günə şəkk günü deyilir. Yaxşıdır ki, şəkk günü qəzası olan qəza, qəzası olmayan isə müstəhəb oruc tutsun. Məlum olsa ki, həmin gün Ramazan ayının ilk günü idi, həmin oruc Ramazan ayının ilk günün orucu hesab olunacaq. Xatırladaq ki, mübarək Ramazan ayının daxil olması ilə bağlı saytımızda elan mayın 16-sı axşam saatlarında veriləcək.

Ramazan hilalı görsənən gecə ay boyunca oruc tutulacağını niyyət etmək gərəkdir. Hilalı görən zaman ona baxıb aşağıdakı duanı oxumaq olar:

Rəbbi və rəbbukəl-lahu rəbbəl-aləmin. Allahummə əhilləhu əleyna bil-əmni vəl-iman vəs-səlaməti vəl-islam vəl-musaraati ilə mə tuhibbu və turza. Allahummə bərik ləna fi şəhrina haza vərzuqna xəyrah və əunəh vəsrif ənna zurrahu və şərrəh və bəlaəhu və fitnətəh.

Rəbbim və rəbbin  aləmlərin rəbbi olan Allahdır! İlahi, bu ayla birgə bizə əmniyyət, iman, salamatlıq və Sənə təslimlik gətir.  Qoy bu ayda Sənin sevdiyin və razı olduğun işlərə tələsək. İlahi, bu ayı bizim üçün bərəkətli, onun xeyir və dəstəyini isə nəsibimiz et. Onun zərər və pisliklərini, bəla və pərişanlığını bizdən uzaqlaşdır.

Ramazan ayının ilk gecəsi müstəhəb qüsl almaq tövsiyə olunur. İmkanı olanlar “Səhifeyi-Səccadiyyə” kitabındakı 44-cü münacatı – imam Səccadın (ə) bu mübarək ayın daxil olması münasibətilə oxuduğu duanı oxuya bilər. Habelə, aşağıda göstərilən qaydada dörd rükətli namaz qılmaq da bəyənilir: 2 dəfə 2 rükətli adi namaz qılınır, hər rükətdə Fatihədən sonra 15 dəfə ixlas surəsi oxunur. Ramazan ayının digər günlərində olunan ibadətləri bu gün də yerirnə yetirmək olar.

Qeyd edək ki, mayın 17-dən etibarən Ramazan ayı boyunca Məşədi Dadaş məscidində zöhr-əsr namazlarından sonra moizə məclisləri təşkil olunacaq. Hər gün  günorta azanı zamanı hacı Şahin Həsənli camaat namazlarına imamət edəcək və ardınca xütbə oxuyacaq. Daha sonra tanınmış qari hacı Ruslan Qasımovun rəhbərliyi ilə cəmlə Qurani-Kərim oxunacaq.

 

Mənbə: weIslam Cəmiyyəti – hacishahin.az

 Saytın materiallarından istifadə edərkən halallıq üçün istinad vacibdir! Əks halda halallıq verilmir!

Mətndə səhv tapmısınız? Sözü seçib Ctrl+Enter klikləyərək bizə göndərin! Əvvəlcədən təşəkkür edirik!

Bir cavab yazın

This site uses Akismet to reduce spam. Learn how your comment data is processed.

Spelling error report

The following text will be sent to our editors: