Fitrə zəkatının verilmə qaydası, zamanı və məkanı barədə

(Ayətullahul-üzma Seyyid Əli Xameneyi cənablarının verdiyi cavablara əsasən)

Fitrəni kənara qoymağın zamanı

Sual: Fitrəni kənara qoymağın və onu ödəməyin vaxtı nə zamandır?

Cavab: Şəvval ayının hilalının göründüyü sübuta yetdikdən sonra mükəlləf fitrə zəkatını kənara qoya bilər. Əgər o, bayram namazı qılırsa, ehtiyat-vacibə görə fitrə zəkatını namazdan qabaq verməli və ya kənara qoymalıdır. Əgər bayram namazı qılmırsa, Fitr bayramı gününün zöhrünə qədər təxirə sala bilər.

Fitrəni kənara qoymaq və ondan istifadə etmək

Sual: Əgər mükəlləf fitrəni kənara qoysa, onu istifadə edib, sonra onun yerinə başqa mal (pul) qoya bilərmi?

Cavab: Xeyr, kənara qoyduğu malı (pulu) fitrə olaraq verməlidir.

Fitrə zəkatını Fitr bayramından qabaq vermək olarmı?

Sual: Fitrəni Fitr bayramından qabaq fəqirə vermək olarmı?

Cavab: Xeyr, kifayət etmir. Amma fəqirə borc verib, Fitr bayramı günü verdiyi borcu fitrə ünvanında hesablaya bilər.

Fitrə zəkatını başqa şəhərə göndərmək

Sual: Fitrə zəkatını başqa şəhərə göndərə bilərikmi?

Cavab: Əgər mükəlləfin yaşadığı yerdə və şəhərdə müstəhəq tapılmasa, fitrəni başqa şəhərə apara bilər.

Fitrə zəkatını vəkil vasitəsilə vermək

Sual: Əgər başqa bir ölkədə müstəhəq və daha ehtiyaclı fərdlər olsa, bu fərdlərə çatdırılması üçün fitrə zəkatını bayramdan bir neçə gün qabaq vermək olarmı? Əgər bu işi telefon danışığı vasitəsilə bir şəxsə tapşırsam və ölkəyə qayıtdıqdan sonra müstəhəqlərə verdiyi məbləği ona versəm, bunun hökmü nədir?

Cavab: Sizin tərəfinizdən fitrə zəkatını ödəməsi üçün özünüzə vəkil təyin etməyinizin maneəsi yoxdur. Vəkil təyin etmənin yuxarıda deyilən qaydada (yəni istər telefonda zəngləşərək, istərsə də başqa bir yol ilə) olması fərq etmir. Amma fitrə zəkatının öz vaxtında verilməsi vacibdir.

Fitrə zəkatını verməyi unudanın hökmü

Sual: Fitrə zəkatını verməyi unutmuşam. Bunun hökmü nədir?

Cavab: Əgər fitrə zəkatı verməmisinizsə, fitrə sizin öhdənizdən götürülmür. Əda və ya qəza niyyəti etmədən onu ayırmağınız və verməyiniz vacibdir.


Mənbə: Deyerler.org

Saytın materiallarından istifadə edərkən halallıq üçün istinad vacibdir!

Bir cavab yazın

This site uses Akismet to reduce spam. Learn how your comment data is processed.

Spelling error report

The following text will be sent to our editors: