Bir çoxlarımızın İmam Əli (ə), İmam Hüseyn (ə) dedikdə ürəyimiz titrəyir. İmam Rza (ə) dedikdə onunla olan davamlı münacatımızı xatırlayırıq. İmam Zaman ağa (ə.f) da hər birimiz üçün əziz və doğmadır. Lakin Həzrət Peyğəmbər (s) hər bir müsəlman üçün əlçatmaz bir günəş kimi görünür. Ona görə ki, Həzrətin (s) məqamı çox böyükdür və ona təvəssül etmək hər kəsin işi deyildir. (Tebyan)
Bu düzdür ki, gün ərzində Həzrətin (s) adını dəfələrlə səsləndiririk. Ancaq Həzrətlə (s) olan sevgi bağlarımız zəifdir.
Yəqin ki, bir çoxlarınız eşidib ki, Şəban ayı – Peyğəmbərin (s) ayıdır. Həzrət Peyğəmbər (s) buyurur: “Şəban mənim ayımdır və Ramazan ayı ALLAHın ayıdır. Hər kim mənim ayımda oruc tutar, Qiyamət günü onun şəfaətçisi olaram”.
Bu ay Həzrətlə (s) rabitə qurmaq üçün yaxşı fürsətdir. Bacardığımız qədər Həzrətə (s) yaxın olmağa çalışaq və bu ayın necə sürətlə keçdiyinə diqqət edək. Necə ki, Rəcəb ayı bir göz qırpımında gəlib getdi.
Bəs Həzrətlə (s) necə rabitə quraq?
Salavat – ən yaxşı salamdır.
Salavat – Əhli-beytə (ə) öz sevgimizi göstərməyimizin ən yaxşı yoludur.
Salavat – ALLAHın həbibinə olan sevgimizin nişanəsidir.
Salavat – bizim ALLAHa və Həzrət Peyğəmbərə (s) yaxınlaşmağımıza səbəb olar. Hədislərimizdə ən üstün əməl kimi tanıdılmışdır. Bu, elə bir əməldir ki, Uca ALLAH və mələklər də onu yerinə yetirirlər.
Abdullah ibni Məsud deyir: “Ey ALLAH bəndələri! Nə zaman Peyğəmbərə (s) salavat göndərsəniz, Ona layiqli salam vermiş olarsınız. Çünki yaxşı bilirsiniz ki, sizin bu salamınız o Həzrətə (s) çatdırılır. Ona deyirlər ki, necə salavat göndərməyimizi bizə öyrədin. Deyir: İki əllərinizi dua üçün qaldırın və deyin: اللّهم اجعل صلواتك و رحمتك و بركاتك على سیّد المرسلین و امام المتّقین و خاتم النّبیین محمد عبدك و رسولك امام الدّین و قائدالخیر و رسول الرحمة.
اللّهم البعثه مقاماً محموداً یغبط به الالون والاحرون؛ اللهم صل على محمد و آل محمد، كما صلیت على ابراهیم و آل ابراهیم انك حمید مجید.
Yuxarıda da dediyimiz kimi, bu cür salavat Həzrətə (s) çatdırılır və ona görə də yaxşı olar ki, bu salamı verdikdən sonra onun cavabını eşitməyə çalışaq.
Salavatın əhəmiyyəti haqqında çox sayda hədislərimiz vardır. İmam Sadiq (ə) buyurur: “Hər kim Peyğəmbər (s) və Ali-Peyğəmbərə (ə) hər gün 100 dəfə salavat göndərərsə, 70 mələk onu əhatə edər və həmin salavatı Peyğəmbərə (s) çatdırmaq üçün öz rəfiqlərindən qabağa düşərlər”.
Həzrət Peyğəmbər (s) buyurur: “Hər kim bir dəfə xaliscəsinə və ALLAH bəyənən kimi mənə salavat göndərərsə, Pərvərdigar sağlamlıq və afiyət qapısını üzünə açar”.
Beləliklə deyə bilərik ki, Peyğəmbərin (s) ayı olan bu Şəban ayında onun bərəkətlərini əldən verməyək. Əgər oruc tuta bilmiriksə və ya müstəhəb namazlarını qıla bilmiriksə, salavat göndərək. Və Şəbaniyyə salavatını dərk etməyə çalışaq.
