Bakının bu yollarında sürət həddi aşağı salındı

Bakı Kənar Dairəvi yolunda maksimum sürəti 80 km/saata endirilib.

Bakıda “Oyunlar zolağı”nın olduğu yollarda ümumi hərəkət sürəti dəyişdirilib. Bakı şəhər Dövlət Yol Polis İdarəsi Yol hərəkəti idarəetmə şöbəsinin rəisi, polis polkovnik-leytenantı Mübariz Qazıyevin ANS PRESS-ə verdiyi məlumata görə, Bakıda keçiriləcək l Avropa Oyunları zamanı yol hərəkəti təhlükəsizliyinin təmin olunması ilə əlaqədar Avropa Oyunlarına cəlb edilmiş nəqliyyat vasitələrinin hərəkəti üçün nəzərdə tutulmuş xüsusi zolaqların keçdiyi bəzi yollarda ümumi hərəkət sürəti dəyişdirilib.

Bakı Kənar Dairəvi yolda nəqliyyat vasitələrinin maksimum hərəkət sürəti 80 km/saata endirilib. Bəzi xüsusi zolaqlarla kəsişmə yerlərində isə 40 km/saata salınıb.

Qeyd edək ki, bu məhdudiyyət Avropa Oyunları qurtarana qədər davam edəcək.
Mübariz Qazıyev Bakıda “oyunlar zolağı”na qanunsuz daxil olan nəqliyyat vasitələrinin sayı xeyli azaldığını bildirib. Onun sözlərinə görə, bu günə qədər paytaxtda quraşdırılan kameralar vasitəsilə 2000-ə yaxın sürücü həmin qaydanı pozduğuna görə qeydiyyata düşüb.

“Mayın 29-da, qadağanın tətbiq olunmağa başladığı gün qayda pozan çox idi. Çoxu bilmədiyi üçün xəttə girirdi. Bu gün isə bir az azalıb. Mayın 29-da 600, 30-da 350, 31-də isə 300-ə yaxın sarı zolağa girən sürücü kamera vasitəsilə müəyyən edilib. Gün ərzində təxminən 200-ə yaxın sürücü qayda pozur. Bundan başqa, kameraya düşməyən, lakin yol polisləri tərəfindən qeydə alınan qayda pozan sürücülər də var”.

Mənbə: ANS PRESS

Bir cavab yazın

This site uses Akismet to reduce spam. Learn how your comment data is processed.

Spelling error report

The following text will be sent to our editors: