Həzrət Əli (ə.s) haqqında bir gözəl şeir

Salam, əziz və dəyərli mömin bacı və qardaşlarım! Bildiyimiz kimi Ramazan ayının 21-i cəmi möminlərin əmiri, Həzrət imam Əli (ə.s) şəhadəti günü idi. Bu münasibətlə bütün möminlərə baş sağlığı verirəm. ALLAH bizi hamılıqla onu sevib uca tutanlardan qərar versi̇n, İnşaALLAH! O Həzrətin (ə.s) haqqında mənim sizə çatdırmaq istədiyim bəzi şerlərim var. Əvvəlcədən müəyyən səbəblərə görə gecikdiyimə görə üzr istəyirəm. Hər şey vaxtında, daha doğrusu, öz yerində olanda daha təqdirəlayiq olur. Amma neyləmək olar ki, hər şey istədiyimiz kimi olmur. Görünür, bunda da ALLAHın bir hikməti var. ALLAH bilən məsləhətdir. İcazənizlə, şerlərimdən birini sizə təqdim edirəm.

 

HƏZRƏT ƏLİNİN (ə.s)

 

Dolaşır aləmi söz-söhbəti Həzrət Əlinin (ə),

Nər idi, hardadı ər qeyrəti Həzrət Əlinin (ə)?!

Uzun illər din-iman olmayıbdı eynimizə,

Qonub artıq bu müqəddəs şəriət çiynimizə.

Saldı ALLAH xofu qəflətlə dolu beynimizə

Ləli-gövhərdən olan hikməti Həzrət Əlinin (ə),

Nər idi, hardadı ər qeyrəti Həzrət Əlinin (ə)?!

Canı qurban eləyir şiələr hər kəlməsinə,

Qoşulub cəmi müsəlmanlar onun haqq səsinə.

Çünki düşmənləri bənd oldu bircə zərbəsinə,

Gəzdi dillərdə gücü, qüdrəti Həzrət Əlinin (ə),

Nər idi, hardadı ər qeyrəti Həzrət Əlinin (ə)?!

Yazıqlar ol kəsə ki, sevmədi bu şəxsiyyəti,

Niyyəti şübhəli çün, yoxdur onun keyfiyyəti.

Gözəl örnəkdi bizə saflığı, həm ünsiyyəti,

Çox idi Rəbbimizə diqqəti Həzrət Əlinin (ə),

Nər idi, hardadı ər qeyrəti Həzrət Əlinin (ə)?!

Aldılar haqqını əldən, acısın duymadılar,

Şəri şər üstdən edib, rəzalətdən doymadılar.

Seçdilər dünyanı dost, Tanrı hökmü saymadılar,

Məhşərdə aşkar olar höccəti Həzrət Əlinin(ə),

Nər idi, hardadı ər qeyrəti Həzrət Əlinin (ə)?!

Hər savaş meydanının təkcə pəhlivanı idi,

Rəsulun (s) ən sevimli dostu, mehribanı idi.

Rəbbi çox sevdi onu, ALLAHın (c.c) aslanı idi,

Tanrının fəxri idi cürəti Həzrət Əlinin (ə),

Nər idi, hardadı ər qeyrəti Həzrət Əlinin (ə)?!

Varmı bir kəs doğula Kəbədə Həzrət Əli (ə) tək,

Kimə ondan savayı Rəbbi adın verdi, görək?!

Əli (ə) düşmənləri, şəksiz behiştə girməyəcək,

Qala bilməz cəzasiz firqəti Həzrət Əlinin (ə),

Çoxdu ALLAH (c.c) yanında izzəti Həzrət Əlinin (ə),

Nər idi, hardadı ər qeyrəti Həzrət Əlinin (ə)?!

 

Paylaşdı: Xuraman Nəcmi

 Saytın materiallarından istifadə edərkən halallıq üçün link ilə istinad vacibdir! Əks halda halallıq verilmir!

Mətndə səhv tapmısınız? Sözü seçib Ctrl+Enter klikləyərək bizə göndərin! Əvvəlcədən təşəkkür edirik!

Bir cavab yazın

This site uses Akismet to reduce spam. Learn how your comment data is processed.

Spelling error report

The following text will be sent to our editors: