Mübarək Ramazan ayı gəlir. Əsl zamanıdır ki, gün ərzində məşquliyyətlərimizi nəzərdən keçirək. Onların içində aqibətimiz üçün birmənalı faydalı olanları sıralıyaq. Əbəs və şübhəli olanlardan imtina edək.
Mübarək Ramazan ayı gəlir. Bu zaman ən diqqət etməli mövzulardan biri də – vaxtın tənzimlənməsidir. Mübarək Ramazan ayında ixtiyarımızda 29 və ya 30 gün var. Hər günün də 24 saatı. Burada yay fəslinin olmasını da nəzərə almalıyıq. Yəni iftar vaxtından sübh namazına qədər təqribi 6 saat 30 dəqiqə vaxtımız var. Oruc tutulan müddət isə təqribən 17 saat 30 dəqiqə civarındadır. Ən əsası – bu haqda DÜŞÜNMƏKdir. Düşünsək, səmərəli planlaşdırma da edəcəyik. ALLAHdan tofiqat diləyirik.
Mübarək Ramazan ayı gəlir. Düşünsək, ölümü xatırlasaq, keçənlərdən peşman olub, tövbə etsək, amma bunlarla yanaşı, yekunda bir daha qəsdən təkrarlamamağa əzm hasil etməsək, bu mübarək ayın bərəkətlərindən tam bəhrələnə bilmərik. Mübarək Ramazan ayı bizlərə ƏZM dərsi verən aydır.
Mübarək Ramazan ayı gəlir. Daxilimizdə bir hərəkətlənmə var. Çox kənarlaşmışıq öz fitri halımızdan. Haşiyələr bizi məşğul etmişdir. Qayıdış. İlahi dərgahda olmağın fərqində olmağa qayıdış. Mübarək Ramzan ayı – QAYIDIŞ ayıdır.
Mübarək Ramzan ayı gəlir. Onun gəlişi – özümüzü təftiş etmək üçün gözəl fürsətdir. Əgər vicdanla nəzər salsaq, yaşayışımızın vəziyyətindən peşiman olarıq. Peşmançılıq. Bütün hərəkətlərin başlanğıcı olan vücudi peşmançılıq.
Mübarək Ramazan ayı gəlir. Tövbəsiz daxil olsaq, bulaşmış tutumumuzla bu ayın işığından bəhrələnə bilmərik. Gərək tövbə edək. İndiyə qədər həyat nemətini israf etdiyimiz üçün TÖVBƏ edək. Bildiklərimizi etmədiyimiz üçün tövbə edək. TÖVBƏ – tutumumuzun paklanmasıdır. Mübarək Ramazan ayına bulaşıqlı halda deyil, paklanaraq daxil olaq.
Mübarək Ramazan ayı gəlir. Ətrafımıza nəzər salaq. Nə qədər insanlar var ki, keçən il mübarək ayı bizimlə olublar. İndi isə dünyalarını dəyişiblər. Ola bilsin ki, bu da bizim SON mübarək RAMAZAN ayımızdır. Ölümümüzü düşünək. Bizə çox yaxın olan ölümümüzü düşünək. Düşünsək, bu dünyanın müvəqqətiliyini anlayarıq. Buranı hədəf deyil, vasitə seçərik. Ölümümüzü düşünək. Həyatın ən real olan sonucu haqqında düşünək.
Mübarək Ramazan ayı gəlir. Bizim üçün gəlir. Halımız haqqında düşünək. Bizim üçün gələn bu İlahi aya hazırıqmı? Halımız necədir? Onun dərgahında olmağımızdan qəflətdə deyilikmi?
Halımızın narahatlığını nə təşkil edir? Nigarançılıqlarımızın məzmunu nədir? Müvəqqəti dünya bataqlığını özümüzə hədəf seçməmişikmi?
Halımız necədir? Nə halla mübarək ayı qarşılayırıq? Halımız haqqında təfəkkür edək. Bu az qalan müddətin içində ən bərəkətli və faydamıza olan iş budur. Təfəkkür etməsək, anlamasaq, vəziyyətimizin acınacaqlığını duymasaq, hərəkətə keçə bilməyəcəyik.
Mübarək Ramazan ayı gəlir. Bütün nurani imkanları ilə. Yetər ki, qarşılayaq. Qablarımızı hazırlayaq. Tutumlarımızı işlək hala salaq.
Mübarək Ramazan ayı gəlir. ALLAHın qonaqlığına dəvətliyik biz. İlahi ziyafətin Sahibinin kərəminə arxayınıq. Getdiyimiz yerin bütün mayası təqva ilə yoğrulub. Qidanı təqva ilə qəbul etsək, ziyafətin dadını hiss edərik. Ziyafətin hədəfi TƏQVAlı halımızın əmələ gətirilməsidir. Ziyafətin geyimi də təqvadır. Qidası da təqvadır. Hədəfi də təqvadır.
Mübarək Ramazan ayı gəlir. Bəlkə də sonuncu fürsətdir. Hazırlığa nə qədər vaxt ayırsaq, o qədər tutumumuz var.
Mübarək Ramazan ayı gəlir. Halımız haqqında təfəkkür. Ölümü xatırlamaq. Tövbə haqqında düşünmək. Keçəndən peşmançılıq. Qayıdış. Düzəlmək əzmi.
Vaxtın tənzimlənməsi. Şübhəli və əbəs işlərin tərki. Hər günə son fürsət kimi yanaşma. Növbəti günün daha yaxşı olmasına çalışma. Təvəssül. Təvəkkül. Xof və ümid!
Paylaşdı: Ramin Cabbarly
Mənbəə: Hacı İlqar İbrahimoğlu
