Günəş tutulmasına görə vacib ayət namazı qılınmalıdır

Xəbər verildiyi kimi, dekabrın 26-sı səhər saatlarında Günəş tutulması hadisəsi baş verəcək.
Bilindiyi kimi, şəri qaydalara əsasən, Günəş tutulmağa başlanandan açılmağa başlananadək ayət namazı əda niyyətilə qılınır.

Tutulma açılmağa başlanandan sonra isə əda və qəza niyyəti etmədən qılmaq lazımdır.
Tutulma tam açılandan sonra isə qəza niyyətilə qılınır.

Dekabrın 26-da baş verən Günəş tutulmasına görə ayət namazını səhər saat 07.40-da artıq qılmaq olar.
İnşəallah ki, əda niyyətilə qılınma periodu təqribən 07:40 – 08:50 arasında gözlənilir.

Ayət namazı 2 rükətdir, hər rükətdə 5 rüku var.

Ayət namazının bir neçə qılınma üsulu var. Onlardan ən sadəsi – hər rükuda 1 dəfə “Həmd” (“Fatihə”) surəsini oxumaq, sonra hansısa surəni 5 yerə bölməklə qılmaq üsuludur. Bölünən surəni ayələrə bölmək vacib deyil. Bir ayəni bir neçə hissəyə bölmək də olar. Aşağıda misal olaraq, “İxlas” surəsinin bölünməsi ilə qılınma qaydasını təqdim edirik.

Niyyət müəyyən edilir. Sonra təkbir (“Əllahu əkbər”) deyilir. “Həmd” surəsi oxunur. Sonra deyilir: “Bismilləhir-Rahmənir-Rahim. Qul huvəllahu əhəd”. Sonra rükuya gedilir (1-ci rüku).

Rükudan qalxıb, deyilir: “Əllahus-saməd”. Sonra rükuya gedilir (2-ci rüku).

Rükudan qalxıb, deyilir: “Ləm yəlid”. Sonra rükuya gedilir (3-cü rüku).

Rükudan qalxıb, deyilir: “və ləm yuləd”. Sonra rükuya gedilir (4-cü rüku).

Rükudan qalxıb, deyilir: “Və ləm yəkul-ləhu kufuvən əhəd”. Sonra rükuya gedilir (5-ci rüku).

Sonra səcdəyə gedilir, hər namazdakı kimi, 2 səcdə yerinə yetirilərək, 2-ci rükəti qılmaq üçün ayağa qalxılır.

2-ci rükət də eynilə birinci kimi qılınır. 5 rükudan sonra 2 səcdə yerinə yetirilir, sonra təşəhhüd və salam verilərək, namaz bitirilir.

Gündəlik namazlarda müstəhəb olan şeylər, ayət namazında da müstəhəbdir.

Qeyd: Vacib hökm olaraq qəbul edilir

weIslam Komandası: Ayət namazı haqqında geniş məlumat üçün aşağıdakı linkə daxil ola bilərsiniz.

Ayat (ayət) namazı (Geniş izahla)

Gülçöhrə Əliyeva

weIslam Komandası