Bərzəx aləmində olan ruhlarla rabitə qurmaq olarmı?

Bərzəx dedikdə ölümdən sonrakı dünya nəzərdə tutulur. Ancaq nəzərə alsaq ki, yuxu – ölümün qardaşıdır, insan yatan zaman da bərzəx aləminə səfər edər. Orada gördükləri bərzəx aləmində olanlardır, eşitdikləri də bərzəx aləminin səsləridir.
Bəzi insanlar bərzəx aləmini dərk etməyə qadirdirlər. Çünki onların bərzəx aləmini görən gözləri və eşidən qulaqları vardır. Bu insanlar bərzəx aləmi ilə rabitə qura bilirlər. Lakin bu insanların sayı çox azdır. İnsanların əksər hissəsi bu qabiliyyətə malik deyildirlər.
Lakin insan yatan zaman həqiqətən də bərzəx aləminə daxil olar. Bütün insanlar yuxu gördüyünə görə deyə bilərik ki, hər bir insanın bərzəx aləmi ilə rabitəsi vardır. Əgər məqsəd öləndən sonrakı bərzəxdirsə, onda deyə bilərik ki, bu insanların sayı məhduddur.

Məsumlarımızın (ə) belə bir istedadları var idi və onlar nə zaman istəsələr, bərzəx aləminə daxil olub ölülərlə söhbət edə bilərlər. Bədr döyüşündə ölən kafirlərin cəsədini bir çalaya yığmışdılar və Həzrət Peyğəmbər (s) onların ruhları ilə söhbət etmişdi. Hər birini öz adı ilə çağırmış və sonra onlardan soruşmuşdu ki, ALLAHın vədəsinin həyata keçdiyini görürsünüzmü? Səhabələrdən bəzisi bu işə təəccüblənib demişdilər ki, siz ölülərlə söhbət edirsiniz? Peyğəmbər (s) buyurmuşdu: “Siz onlardan daha çox eşidən deyilsiniz. Onlar başa düşdülər ki, mən nə deyirəm. Əgər ALLAH onlara icazə versəydi, bizim cavablarımızı da verərdilər”. (Tebyan)
Əgər tarixə nəzər salsaq görərik ki, peyğəmbərlərin (ə) bir çoxu ölülərlə təmas qurmuşdular. Hətta peyğəmbər olmayan Salman Farsi belə, ölü ilə söhbət etmişdi.
Bəzi insanlar ALLAHın lütfü ilə bərzəx aləminə daxil olub, orada baş verənləri görə bilirlər. ALLAH Təala bəzi bəndələrinin bərzəx gözünü və qulağını açır ki, həqiqətləri dərk edə bilsin.
Beləliklə deyə bilərik ki, bu dünyada olan bir insanın bərzəx aləmində olan ruhlarla rabitə qurması mümkünsüzdür. Lakin çox az insan vardır ki, bu istedada malikdirlər və ALLAH onlara bərzəx gözü və qulağı vermişdir. Bu məqama çatmaq hər kəsə qismət olmur. Bunun üçün nəfsi tərbiyə edib, suluk əhli olmaq lazımdır. İnsan ruhunu elə tərbiyə edər ki, istədiyi zaman bərzəx aləminə daxil olar və orada baş verənləri dünyada olduğu kimi müşahidə edər.

Mənbə: Surf.az via Deyerler.org

Saytın materiallarından istifadə edərkən halallıq üçün istinad vacibdir! Əks halda halallıq verilmir!

Bir cavab yazın

This site uses Akismet to reduce spam. Learn how your comment data is processed.

Spelling error report

The following text will be sent to our editors: